Осы жолы дейтініміз – маусым айы. Құрлықтың алдыңғы қатарлы қол күрес шеберлері Қырғызстанда бас қосады. «Үлкен делегациямен» отандастырымыз да жол тартпақ. Оңтүстік Қазақстан облысының Шардара ауданынан бірқатар Әлем чемпиондарының шыққаны рас. Десе де олардың ізін ала шығысқазақстандық спортшылар да үлкен қарқынға ие болып келеді. Тарбағатай ауданының тумасы Әлижан Мұратов, күршімдік Еркін Әлімжанов, жастар арасында жасындай жарқылдап жүрген Ораз Басаров сынды жерлестеріміз аймақтағы қол күрестің күн санап дамып келе жатқандығының айқын көрінісі. Ендеше, бұл спортшылар осы сенімді Қырғызстанның Ыстықкөл қаласында кезекті рет дәлелдейтіндіктеріне күмән жоқ. Естеріңізге сала кетейік, Еркін Қайнулдинұлы Азия чемпинатына автоматты түрде жолдама иеленіп қойған. Нақтырақ айтсақ, өткен жылы Түркияның Анталья шаһарында алтыншы мәрте әлем чемпионы атанған болатын. Өз сөзінде, Елордада үнемі тыңғылықты дайындық үстінде екенін айтып, реті келсе топ жаруға тырысатынын айтқан еді. Сондай-ақ жерлесіміз бұдан былай 80 келіде бақ сынайтынын жеткізді.

Фото спортшы тарапынан ұсынылды